المساعد الشخصي الرقمي

مشاهدة النسخة كاملة : يوميات فتاة(قصة انما ايه )

جنة الزهراء
04-13-2006, 11:24 AM
السلام عليكم ورحمة الله وبركاته

هذه القصه اتمني تعجبكم وراح تكون على شكل حلقات واتمنى الجميع
يتابعها معاي

الحلقه الاولي ..


كان في بينه اسمها (( هدى )) كل يوم الصبح تروح المدرسه ..

وفي طريق رجعتها تشوف صبي يلاحقها بسيارته الي بيتهم !!

وتقعد تفكر فيه ,, ويش فيه هالصبي ؟؟؟؟

وليش يلاحقني اني بالذات !!

وقالت في نفسها هالمره بس يطوف عليي ويتحجج راحت عليه

لان اخاف اقول الى ابويي ويعصب ويخلي حمايقه فيني ويقعدني

عن المدرسه واخويي نفس الشي هذا الشبل من ذاك الاسد!!

ويش اسوي ياربي والله محتاره هذا طالع لي من وين هالصبي

متغربله غربال اني !!

مادري اني اقول الي صديقتي(( مريم )) جان ارتاح اشوي من الا اني فيه

لازم اقول ليها وفي اليوم الفاني ,,,

مع السلامه في الحلقه القادمه
هاا شرايكم


تحياتي
جنة الزهراء
ملك اسبانيا
04-13-2006, 06:54 PM
يسلمو خيو
ننتظر الحلقة الثانية
جنة الزهراء
04-14-2006, 09:08 AM
بارك الله بك , شكراً أخي الكريم
اخوي ملك اسبانيا يصير اتثبت الموضوع

الحلــــــــــــــــقه الفانيه ..

راحت (( هدى )) المدرسه وشافت صديقتها (( مريم )) وقالت اليها ابغيش في موضوع ضروري

لاني محتاره فيه قالت ((مريم )) اني الحين عندي امتحان الحصه الاولى لكن في الفرصه

يصير خير اوكي ,, قالت ((هدي )) عاد مو تنسين ؟ اني بنتظرش تحت الدرج زين!

ولما ضرب جرس الفرصه القتو مع بعض..

مريم : ويش فيش؟ ويش عندش شغلتين بالي ؟

هدي : سكتي بقول ليش بس مو تقولين الي احد ؟

مريم : تهر الحين اني اقول اسرارش الي احد

هدي: لا مو عن شي بس تدرين اخاف الموضوع يتسرب

مريم : فضفضي حبيبتي سرش في بير

هدي : الصراحه في واحد

مريم : الا سكتين

هدى : ماتشوفين هالدبه ا لا ماره علينا تبغين تسمع !

مريم : انزين اكي راحت كملي غردي

هدي : في واحد كل يوم في الهده يلحقني الي البيت ، والصراحه اني خيفانه مووووووووول

مريم : همنهو هذا تعرفينه ؟

هدى : شدراني اني اول مره اشوفه

مريم : جيفه شكله ؟ اوصفيه لي يمكن اعرفه

هدي : سكتي ويش اقول ليش حليووووووو عدل عدل عدل عنده سياره رصاصيه ماعرف ويش اسمها؟

مريم : شوقتيني لكن اليوم في الهدا بحارش تحت البوابه مو تنسين

هدي : اما الا انسى !

وطق الجرس وكل وحده راحت صفها وكل وحده فيهم تنتظر على نار متي يطق جرس الهدا

ولما طق الجرس وقفت مريم تحارس هدى

الي اللقاء في الحلقه القادمه
ملك اسبانيا
04-14-2006, 01:16 PM
بانتظار الحلقة القادمة باحر من الجمررررر
جنة الزهراء
04-14-2006, 01:51 PM
اوكي
راح احطه
ابدمج لكم حلقة في حلقة علشان بسرعة ولا تستملون ولا تنظرون

الحلقـــــــــــــــــه الفالفه ( 3)

وقفت (مريم ) تنتظر ( هدى ) بس هدى تأخرت اشوي !!

قالت ( مريم ) في خاطرها .. ليكون نست ومشت عني اني بحارسها بس اشوي ادا ماجت بمشي عنها

الا ( هدى ) جايه تأخرت عليش لا

مريم : اييييه جيفه تأخرتين جدي اني الصراحه بغيت امشي

هدي : الصراحه كنت في الحمام اغسل وجهي واعدل حجابي

مريم : هههههههههه ياعيني

هدي: هيييييييييييي ويش فيش لا تفكرين فيي غلط ها

مريم : هدا ويش ماتشد مزحه الا سيده برطمت

هدى : مو عن شي بس ماحب جدي اني

المهم قاموا يتمشون الا ماره عليهم سياره رصاصيه التفتت اليها ( مريم ) الا تقول الي (هدي) هدا ؟

(هدى) الله يغربلش تكلمي عدال لاطلعين صوتش وتفضحينا

رفعت راسها (هدى) وطالعت السياره من طرف عيونها لا تقول لا مو هدا

مريم : شدراني اني شفت سياره رصاصيه قلت يمكن هو ..

مريم : اقول اني بعد هدا لحليوووووووو عدل عدل

هدي: لالالا مو هو هداك سيارته اجدد

مريم : اوووووووووووه كشخه بعد

هدى : عن البياخه

قامت تفكر هدى في خاطرها وتقول .. ويش فيه اليوم ماجاء الكريه الحين بطلع قدام مريم جدابه

مريم : ماحد جاء عفر الا تتخيلين ياهدى

هدى : اني قلت في قلبي قلت الحين بتقول اني جدابه

مريم : لا مو عن شي بس تقولين كل يوم يلحقش ماشوف شي اني

هدى : شدراني اني ابه انتين بعد فقر

مريم : هههههههههههههههههه

هدى: ههههههههههههههههههههههه المشكله اليوم الاربعاء لكن ابصم ليش يوم السبت ردي تعالي وياايي

وشرط تشوفينه

مريم : بنشوووووووف اخرتها وياش



المهم وصلوا بيوتهم وهو ماشافوه ’’’’ دشت ( هدى ) بيتهم وهي تأفأف افففففففففففففف

شافتها امها الا تقول ليها يالله غناتي بدلي وصلي عشان نحط الغدى

هدي : اني مابغي شي شبعانه

امها : جيفه من ويش شبعانه ؟ بلا هرير

اخوها الصغير علاوي : هههههههههه وفرتين

هدى : فج عني مناك مالي زاغرك

امها : اليوم بعد الا اشوف لهجتش غير

دشت هدى حجرتها وصكت الباب بالزور وفلتت الجنطه على الطاوله وهي مضايقه ومتنرفزه وبعد مافصخت

حجابها انسدحت على السرير تفكر وتقول في بالها ويش فيه اليوم السبال ماجاء ’’

افكار تروح وافكار تجي الا تقول بقوم اصلي وبخلي ابليس يولي لان اليوم العصر

عليي اسوي بحث يعني لازم اروح المكتبه اشتري اوراق فلوسكوب بقوم اقول الي اخويي بعد

عن يهيت وانسى ماقول ليه لان البحث طويل ضروري اروح اليوم ,,

طلعت (هدى ) من حجرتها هي تنادي أمااااااااه أماااااااااااه

امها : هااااااااااااااااااا ويش يوم غسلت المواعين طلعتين

هدى : ياماااااااه والله اني اليوم تعبانه حرام يعني لو ماغسلت المواعين يوم

انزين وين اخويي ( حسينو ) ؟؟؟؟؟؟

امها : اكو بره يغسل سيارته وين يعني بيروح تعرفينه كل يوم ويا صديقه في هالسياره الجيكره

هدي: علاوي حبيبي روح بره وقول الي حسين هدى تبغيك ضرووري

علاوي : مانا رايح زين

هدى : لاصير فقيل دم روح احسن ليك

علاوي : قلت ليس مارايح يعني مارايح

هدى : ماعله عجل طالع اليوم ( سبيستون ) اذا ما شفرتها عنك ماعله

علاوي : اما هادي ,, بروح قاعده وتهدد

علاوي : حسينو تبغيك اختي بسرعه ضروري اتقول ليك

حسين: ويش تبغي ,, قول ليها بيخلص الا في ايده وبيجي

علاوي : لالالالا الحين الحين اكي بيشفر عني( سبيستون )

الحين بيحطون ( بي بليد )

حسين : اوكي قول ليها جاي

علاوي : مو تتأخر عااااااااااد

دخل علاوي الصغير وقال الي هدى عطيني الرموت الحين بيجي

بعد شوي دخل حسين ....

هاااااااااااااااااه ويش تبغين خيووو

هدى : عاد ابو علي ودني المكتبه بشتري ليي اوراق بسوي بحث

حسين : اوكي بس برزي روحش بسرعه لان تعرفين ابغي اروح العب كوره

هدي : دقايق بس اني اصلاً بارزه

طلع حسين ينتظر هدي في السياره ,, وجت وركبت هدى قال ليها

اخوها اي مكتبه تبغين اتروحين

هدى : بعد وينه يعني تعرف مكتبة السندي تدلها لا

وصلوا المكتبه الا يقول حسين الي هدى هي عاد انا الا بحول اعرفش

ان حولتين بتصيفين

هدى : انزين بس راوني الاوراق قبل لا تدفع

حسين : خير

نزل حسين من السياره وهدي تنتظر اخوها وشوي والتفتت

الا السياره الرصاصيه عند المكتبه قامت تتأمل صدق هادي سيارته

متأكده !!

طلع حسين يراويها لوراق !!

وكانت الصدمه .... ان لصبي بعد طلع من المكتبه وقلبها يريجف

ياعلى يطلعني الله اليوم اني بغاور عن يشوفني

حسين : ويش هالاوراق اللي تبغينها لو ويش

وهدي مو عارفه ترد متبلعمه تبلعم

وماسمعت الا قوووووووووه ابو علي

حسين : هلا هلا بو جاسم

وينك اليوم ماجيت تقعد ويانا

لصبي طبعاً اسمه ( محمد )

محمد : تدري لا انا اليوم زام نهار

حسين : اوكو خلنا نشوفك عاد في الليل

هدى : مو عارفه تصرف يويلللللللللللللي جان مالتفت ليي

بس اني غاورت قامت طالع اخوها وتقول في قلبها

ماتوقعت انك تعرف هدا اوووه تري اسمه ( محمد )

صدق يعني الصدفه خير من الف ميعاد

احارسه اليوم ويطلع ليي الحين

الحلقه الرابعه ( 4)

ركب محمد السياره وقعد يفكر الا يقول تعال صدق حسين صديقي بيتهم تحت البيت لبنيه الا اتابعها

او نفس البيت بل جان مو اخته وانا مادري لكن يوم السبت بتأكد بنفسي ..

وهي بعد راحت بيتهم وقعدت تفكر فيه وتقول يعني هو ما جاء الان كان في الشغل !!

بقوم بتصل الي ( مريم ) صديقتي وبقول ليها عن الا صار

ترن ترن ترن ترن

مريم :آلو من ويايي

هدى : هلا مريم زين شلتينه

مريم: ويش صاير ؟؟؟؟

هدي : سكتي يامريم اليوم صارت بلاوي

مريم : قولي ويش نشفتين ريقي

هدى : شفت الافندى

مريم :حلفي ,,,,,, لكن في وينه اني يوم افارقش ماشفنا شي ء

هدى : لاع رحنا المكتبه وصار (وقالت لها الا صار بالتفصيل الممل )

مريم : يويللللللللللي بقوليش بس مو تزعلين مني ؟؟!

هدى : ويش قولي مابزعل لا ؟؟

مريم : مو تقعدين تفكرين فيه خله يولي عنش وفكري في دراسش تري مصبنة هالايام ماتأمن ليهم

هدى : هههههههههههه انتين تضحكيني والله مافي مخي شي لا عنه

اسمعي بخليش لا الحين يجي ابويي ويسوي الوقعه داك الشهر جاينا البيل واجد

اوكي باي باي نلتقي يوم السبت

مريم : على خير ان شاء الله

وجاء يوم السبت ....

ومثل ماتفثقوا الا تطلع قبل تنتظر الثانيه عن البوابه وبعد ماطق جرس الهدا انتظرت مريم هدي

جت هدى وقعدوا يتمشون شوي الا السياره الرصاصيه جايه !!

هدى : هاكوا جاااااااااء

مريم : هدا هو ؟؟؟؟؟؟؟؟؟

هدى : ايه هدا هووو بشحمه ولحمه

مريم : بلللللللللللللللللللل صدق جميييييييييييييييييييييييل عدل ماخلى جمال الي لصبيان بعد

هدى : ياعلي قلبي يرجف موعارفه امشي

مريم : تهر وتقول بعد ماليها كار

هدى : لاتسبلين عليي

مريم : يويللللللللللللللللللللللي اكو يمشي بعدال

محمد : هادي منهي بعد الا وياها اليوم ؟؟ اففففففففففففففففففف ويش هالجانس الفقرصج نحس انا


لكن تدري ؟؟؟ اكوا شكلها تدري اكي اطالع ايها انا بقط الرقم والا فيها فيها

كتب محمد الرقم على ورقة لكلينس الا في سيارته

وقرب تحتهم ورماها وساق بســــــــــــــــــرعه

مريم : يويلللللللللي اكو رما رقمه بشيلينه ؟؟؟؟

هدى : مادري انتين ويش رايش ؟؟؟!!!

مريم : اني اقول شيليه وتصلي ليه وعرفي هدا ويش يبغي بالضبظ ؟

هدى : اني بشيله وانتين طالعي مابغي احد يشوفني
!
مريم : شيليه بسرعه محد كلش في الشارع !!

سمعت هدى كلام مريم وشالت الرقم وبعد ماصلت البيت كانت فرحانه وتغني وتفكر بعد ماتروح امها الماتم

تتصل فيه لان محد بيكون في البيت

بعد ماتغدت هدى وغسلت المواعين دخلت تكتب واجباتها المدرسيه وماخلصت الا الجو فاضي
الام في الماتم والاخوان بره والابو في الشغل ,,

اخذت المفتاح وقفلت باب الحوش عشان ما حد يطيح عليها دخلت حجرتها وشالت الرقم من مخبه ميريولها وراحت الصاله ..

شالت السماعه وهي ترتجف متردده تتصل او لا واستمرت على هالحال ثلاث مرات

بعدين قالت يالله بتصل قبل لاجي امي اتصلت ... ترن ترن ترن

وشال التلفون آلـــــــــــــو آلـــــــــــــــو

هدى من الخوف مو عارفه تتكلم وعلى طوول صكته ,, طبعا هو طلع عنده الرقم

قام واتصل وهدى ماتوقعت ان يكون هو ؟؟

هدى : الو

محمد : اختي احد داق علي الحين

هدى : اي اني وهي خدودها من الخجل صايره طماط

محمد : وبكل ادب .....من معاي

هدى : الصراحه اني ,, اني ,, اني

محمد : ويش فيش ؟ وعلى طول فكر قال اكيد هي

هدى : اني الا عطيتني الرقم اليوم

محمد :وابتسامه عريضه هلا عمرررررري هلا والله

هدي : سكتت من الفشيله وقلبها يرجف وريقها ناشف

محمد : ويش فيش عمري ليش ساكته

هدى : صوبه صرت عمرك وانت ماتعرفني ؟؟

محمد : من قال انا صار لي اكثر من شهر وانا انتظر هاللحظه ! احس اني مرتاااااااااح

هدى : انزين خلك من هالمقدمات ويش تبغي ؟

محمد : شكلي مضايقنش ؟

هدى : لا مو عن شي بس ابغي اعرف ويش تبغي مني ؟

محمد : وبكل جرأة أحبــــــــــــــــــــــك

هدى : انزهقت من هالكلمه وعلى طوووووول صكت التلفون
ترن ترن ترن ترن

هدى : يويلللللللللللللي اكو رد اتصل متأكده هو ويش اسوي اني ياربي

محمد : شفيش ؟ ليش صكيتين التلفون ؟

هدى : لانني ماتوقعتك تقول ليي جده اني على فكره ماحب هالاسلوب فاهم

اذا تحبني صدق اثبت لي ؟

محمد : خل نتفاهم ونعرف بعض اكثر وبعدين انا حاضر ليش في كل شي

هدى : يعني ويش ؟

محمد : يعني نبغي نتعرف على بعض اكثر عشان نشوف اناسب بعض او ويش

وانا ببتدي وياش انا اسمي محمد عمري 22 اشتغل مع مقاول راتبي 150

هدى : بس سيارتك كشخه ؟

محمد : ههههههههههه هادي مو سيارتي هادي سيارة الوالد انا عندي سكسويل مال الشغل

هدى : في قلبها مسكين صريح ويايي صدق انسان صادق ومتواضع

محمد : ويش فيش كله ساكته ها ؟

هدى : مافيي شي بس افكر في كلامك

محمد : خدي اقل من مهلش بس لاتنسينا ؟

هدى : الحين اني بصك التيلفون ها ؟

محمد : ليش مستعجله ؟

هدى : بصكه لان الحين امي بجي

محمد : انزين بسئلش ؟ ويش اسمش

هدى : متردده حدها بس بعد صمت قالت ليه وبصوت منخفض اسمي هدى

محمد: اللــــــــــــــــه عاشت الاسامي

هدى : يالله ها اني بمشي مع السلامه

محمد : تحملي بروحش

وانصك الخط !!!

دخلت هدى حجرتها وقامت تتنطط من الفرحه ويللللللللللللللللللي قال ليي احبش
وهي تغني (( ياسعدي انا الليله ,, يافرحي انا الليله )) ومره وحده توقفت وسألت نفسها

ويش فيش ياهدى الا فرحانه ؟؟ ليكون اني حبيته صدق عفر الا حبيته ياعلي حليييييييو

صوته يجنن عندليب عندليب احسه حنون خلف جبدددددددددي وطرق الجرس مال البيت

بل اكيد امي نسيت مابطلت الباب هدا مو خلي ليي رأي

وركضت بسرعه ومن الخوف ضربت بيدها الكيلو مال الباب وتعورت فتحت الباب الي امها وهي ببرج على ايدها ,,

امها : الا صاكه الباب ؟

هدى : الصراحه بروحي خفت

امها : منش ماترضين تجيين ويايي الماتم

هدى : عليي مراجعه ياميي وكتيبه جيف اروح وياش

امها : ويش فيش الا تبرجين على ايدش

هدى : ضرب الكيلوا

امها : بشووووووووووووووف ياعلي اكوا كتل

هدى : ويش اسوي بعد هذا الا صار

ويوم ثاني ,,,
الي اللقاء في الحلقة القادمه

ارجو ان يثبت
ملك اسبانيا
04-14-2006, 02:56 PM
والله قصة رووووووووووعة
ننتظر الحلقة القادمة ,, والموضوع ثبته خيو
جنة الزهراء
04-14-2006, 06:13 PM
الحلقة الخامسة (5)

وبعد ما خلا الجو ردت اتصلت هدى الي محمد ( واستمروا على هالحال يومياً )

وانتهى الفصل الدراسي الاول وجت عطلة الربيع ,,

وطبعا انتون عارفين ان هدى صديقة مريم واشتاقت ليها قالت اليوم بمر عليها فجت عليي

اخذت شور امها وقالت ليها بس عاد مو تتأخرين !!

راحت هدى الي مريم وسلموا على بعض ودخلت وياها حجرتها وقاموا يسولوفون

شوي الا الخدامه طاقه الباب و تقول الي مريم تعالي ماما في تلفون حق انتي

مريم : هدي حبيبتي بروح وبجي شوي بس

هدى : خدي راحش

مريم راحت ترد على التلفون وبعد ماخلصت رجعت حجرتها الي هدى

هدى : اكيد البنا ت متصلين ؟

مريم : هادى(( حنان)) عازمتني على عيد ميلادها وقلت ليها هدى ويايي قالت ايه

اني اتصلت ليها بيتهم قالت امها وياش المهم عزمتش تعالي بنروح جميع ها

هدى : اييييييييييه اما الا

مريم : جيفــــــــــــــه

هدى : اي مايرضه حسين اخويي امشي وياها مره جاء لي في الهدا المدرسه

وشافها تمشي ويايي ماقصر فيي عفر عليي عفااااااااااااار شطف ابي

مريم : يؤؤؤؤؤؤؤؤؤ مو زين مسكينه طيبه

هدى : ادري طيبه بس اتعرفين سمعتها بعد

مريم : شعليش انتين غير بتروحين ويايي

هدى : اني باستشير اخويي وامري الي الله

وبعد ما استانسوا مع بعض قالت هدى اني بمشي لان الحين قريب يأدن

وان شاء الله اذا الله كنب بتصل فيش اخبرش بروح او لا

مريم : اوكي مع السلامه مو تنسين اني بحارس الو منش

هدى : على خير

رجعت هدى البيت وسئلت امها وين حسين ؟

امها : تعرفينه من بعد مايصلي في المسجد يرجع عشان يشتري لينا عشى

هدى : اماااه اني بروح حجرتي اصلى ادا جاء قوليي ليه ابغيه ضرووووي

امها : حق ويش

هدى : عيد ميلاد رفيقتي ابغي اقول ليه عشان اشتري ليها هديه

امها : عندش بيزات ؟؟؟؟

هدي : اي عندي

راحت هدى حجرتها وصلت مهلت اشوي الا حسين داخل عليها يقول ليها

امي تقول تبغيني؟ ويش تبين ؟

هدى : بقول ليك شي عاد مو تستحمق عليي

حسين : هااااااا ويش قولي خيوووو

هدى : اني صديقتي عازمتني على عيد ميلاد ابغيك توديني اني ومريم

حسين : من وينه هي ؟

هدى : صديقتي حنان ؟ وهي خايفه من رد فعله عدل

حسين : اي حنــــــــــــــــان

هدى : حنان الا مره شفتني ايها وشطفت

حسين : انتين متى بتعقلين ؟ هاااااااا انا جم مره قايل ليش هالبنيه مابغيش تمشين ايها ماتفهمين انتين هادي وحده دليعه , لاتمشين اياها تشوهين سمعش يالله مافي روحه فاهمه

طلع حسين مستحمق وصفق الباب ومشي

امه : ويش فيك حسينو الا قاعد تهاوش اختك

حسين : هادى يمي ماتفهم قايل ليها الف مره هالبنيه مابغيش تمشين ايها لكن هي مصره على ان تعاندني

امه : هي غير بتروح عيد ميلاد ؟

حسين : ادري لكن لو وحده غير وافقت لكن الي هالفاجهه مافي امل اوديها

قامت هدى تصييح وراحت ليهاا امها وقالت ليها يابتي مدام اخوش مو راضي لاتسوين لروحش سوالف وياه

هدى : مو عن شي بس فشيله لبنيه ماسوت فيي شي

امها : اخوش يابتي يخاف عليش ويبغي مصلحتش

المهم اتصلت هدى الي مريم وقالت ليها عن الي صااااااااااار كامل

وخبرتها ان تقول الي حنان ان عندهم ضيوف اليوم ولا قدرت اتجي

يوم فاني جاء ابوها من الشغل وهم قاعدين يتغدون قال ليها ابوها

ابغيش بعدين ،،

هدى : غصت وهي تقول الي ابوها ويش تبغي ؟

ابوها : بعدين بتعرفين

هدى في قلبها الله يستر جان ما نكشفت لان اول مره ابويي يقول ليي جدي

هدى مي عارفه تتغدى قامت

امها : الاقمتين ماكلتين شي

هدى : لا اني شبعانه اليوم

ابوها يطالع امها ويبتسم

علاوي : ابويي وش صاير الا تضحجون

ابوه : هههههههههههه لغوووووووووي هالولد

قعدوا يضحكون كلهم في السفره

وبعد ماقامو راح ابوها المجلس نادت عليها امها وقالت ليها اني بروح المجلس وانتين جيبي الي ابوش دلة الجاي

هدى مرتبكه والخوف مبين عليها حملت الدله والاستكانات وطقت الباب

ابوها دخلي هدوووووي

دخلت هدى وهي حدهاااااااا ترتعش قال ليها ابوها قعدي
الى اللقاء في الحلقة القادمة
ملك اسبانيا
04-14-2006, 06:32 PM
هههههههه خيو لاتطولين ترى انطر بقاياها لان صج روعة
حاولي تكملينها باسرع وقت
جنة الزهراء
04-15-2006, 02:57 PM
كل يوم جزء له علشان اشوقكم << اشوق من بس واحد الي رد على الموضوع


الحلقة السادسة (6)

سمعت هدى كلام ابوها وقعدت قالت اليها امها صبي الجاي الي ابوش
صبت هدى الجاي وطاولته ابوها اخده ابوها منها وهي حدها ترتعش
قال ليها ابوها ,,

اسمعي يابتي ..

انتين الحين صرتين كبيره والحمد لله واكوا جايين ليش خطاطيب !!

هدى متفأجئه بالخبر ,, وعلى طول من غير مقدمات منهو هادا

ابوها : واحد ويانا في الشغل عنده ولد ماشاء الله زين وخلوق وفوق هادا

مخلص دراسته ويستغل في بنك ولصبي واجد زين انا كذا مره اشوفه ويه ابوه في المسجد

امها : هو قال يبغي بتي هدى ؟؟

الابو : ايه يقول مرته شافت بتي مره وياش في المعاريس وعجبت فيها وقالت الي ولدها وهو طرش ابوه
يقول ليي

امها " جم عاد عمره

الابو : مو كبير عمره بس 24 سنه ولد حليو اسمه (علي ) وحبوب مافي مثله

ويش قلتين هدوي حبيبتي ,,

هدى : منزله راسها من الفشيله ومرتبكه وتقول وبصوت خفيف بس اني ابغي اكمل دراستي

تعرفون هادى اخر سنه عليي واني ابغي اجيب مجموع وابغي ادخل الجامعه

ابوها : مو مشكله انتين وافقي الحين وانا بتفق وياهم على جدي

هدى : بس اني مافكر الحين في الزواج كلش مابغي شي يشغلني عن رداستي

امها : صلي على النبي اكوا بنت جيرانه مخطوبه وفي الجامعه عادي يعني

ابوها : لاتضغطين عليها ام حسين خلها اتفكر وبعدين تقول ليي رايها زين حبيبتي

هدى : اني بقوم اروح اغسل المواعين

طلعت هدى وهي مضايقه عدل وتفكر ويش اتسوي وياه هالبلوى الا حلت على راسها

وابوها وامها قاعدين يتشاورون مع بعض ويقول الي زوجته حاولي تقنعي بتش لان

الولد وااجد زين وطيب والام تقول بشوف اكو شكلها الا مو راضيه

المهم غسلت هدى المواعين ونظفت بيتهم ودخلت حجرتها وهي تفكر قالت اني ليش ماتصل الي مريم واقول ليها تجي ليي العصر لان احس روحي محتاجه اليها

اتصلت هدى الي مريم وقالت ليها تقدرين تجين العصر ابغيش ضروري

مريم : ماعله بقول الي امي وان شاء بجي ليش

هدى : بنتظرش ضروووري تجين

بعد ماتصلت دخلت حجرتها ترتاح اشوي وقالت بقوم اسبح لان الحين بجي مريم

سبحت وطلعت وماكان احد في البيت ..

طق الجرس وراحت هدى تفتحه الا مريم !!

هلا مريوم شخبارش فجيتين عليي امشي بس ندخل

مريم : تدرين حنان سئلت عنش تقول ليي جيفه ماجت قلت ليها مثل ماخبرتيني اقول ليها

هدى : زين سويتين والله العظيم حصلت زف عدل من اخويي

مريم : انزين انسي الا صار ويش فيش تقولين تبغين ضروري

هدى : سكتي يامريم جايين اليي خطاطيب من طرف ابويي

مريم : زين لا عجل بتعرسين قريب هههههههههه

هدى : طالعوا عنها مستانسه

مريم جيفه ويش صاير عفر

هدى : بصراحه اني ابغي اعترف ليش عن شي بس مستحيه

مريم : قولي غردي ويش هست ؟

هدى : تدكرين لصبي ابو السياره الرصاصيه

مريم : ايه ويش فيه ؟!!

هدى : بصراحه اني احبه وهو يحبني من اخذت الرقم واني كل يوم اكلمه

مريم : يؤؤؤؤ جيفه جدي هدى !! هذا اتفاقنا احنا ماقلنا تاخذين الرقم بس عشان تعرفين ويش يبغي بالضبط
هدى : ايه اني سويت جدي بس مادري جيفه حبيته اشدراش انتين يقول كلام حليو يدخل القلب

مريم : اما انتين صدق غبيه وصدقتينه طبعا ؟ لا

هدى : لاتظلمين لصبي صدقيني انسان شريف ويحبني من كل قلبه

مريم : عجل تدرين انتين متى تتصلين ليه ؟

هدى : كل يوم هالحزه ادا محد صار في البيت يعني

مريم : قومي الحين اتصلي وصوبي وقولي ليه عن سالفة الخطاطيب وبشوف اني ردت فعله يحبش او لا

هدى : استحي احاجيه قدامش

مريم : بلا هرار والحين الحين قومي اتصلي ترى والله ازعل منش ولا تشوفين وجهي بعد

هدى : عجل اول بروح اقفل الباب عن احد يجي ويشوفنا

مريم : يالله قومي بسرعه اشوف

بعد ماقفلت الباب راحوا الصاله واتصلت هدى الي محمد

ترن ترن ترن ترن

محمد : هلا حبيبتي وينش اليوم تأخرتين كنت انتظرش

ومريم تأشر عليها بصبعها وتقول ليها يعني لا تقولين ليه ان اني وياش

هدى : ايه شسوي توه امي طالعه

محمد : انا فقدت الامل قلت مابتتصل اليوم

المهم كل واحد عبر لثاني عن مشاعره وبعدين قالت هدى اليه

محمد بقول ليك شي خبر خطير اليوم صادني

محمد : ويش عمري ويش صاير

هدى: تدري ان جايين ليي خطاطيب

محمد : وانتين ويش قلتين

هدى : افااا محمد تسئلني ويش قلت وكأنك ماتعرفني ؟

محمد : مو عن شي بس احب اعرف يعني ويش قلتين الي بيتكم

هدى : قلت ليهم ابغي اكمل دراستي وماابغي ارتبط الحين

محمد : سمعي ياهدوي انا مابغي اعطلش ويايي تعرفين معاشي ضعيف

وللحين ماكونت روحي يعني يبغي ليي كم سنه على ماكون روحي واجي اتقدم ليش

هدى : عادرتنك والله اني بعد ابغي اكمل دراستي واروح الجامعه

وكانت هدى مخليه التلفون على ( الهند فرى ) يعني مريم تسمع كل الكلام الا صار

بينهم ,,

صكت التلفون هدى

وقالت الي مريم ويش رايش ؟

مريم : شوفي بقول ليش بس عاد مو تزعلين ؟ اني احسه انه واحد لعوب
ويبغي بس يتسله

هدى : ليش تقولين جدي مسكين هو ماقال شي قال ضروفه بس وماعتقد انه غلط

مريم هههههههههه ضروفه ؟ وين كانت ضروفه يوم يقعد يلاحقش ها

لو بنات الناس لعبه افهمي ياهدى مصبنة هالايام مامنهم امااااان

هدى شكلها زعلت من مريم ومو راضيه على محمد

قامت مريم وقالت اني بروح البيت وانتين على كيفش فكري في الموضوع عدل

واني انسانه ابغي مصلحش ,,

لكن هدى سمعت من هالاذون وطلعته من الاذون الثانيه
وابتداءالفصل الدراسي الثاني ....

الي اللقــــــــــــــاء في الحلقة القادمه
سنابسية والنعم
04-15-2006, 03:06 PM
عجيييييييييييييييييييييييبة القصة اندمجت وياه
كملية قصوووووووول بأسرع وقت
تحياتي
هلولو
جنة الزهراء
04-15-2006, 03:11 PM
الحلقة السابعة (7)

وراحت هدى المدرسه والقت ويا البنات هلووو وو شخباركم عاش من شافكم

والله ليكم وحشه وكل وحده قامت تسلم على الفانيه ,, شوي الا جايه مريم

سيده راحت ليها هدى !! لا يقولون البنات اوه اوه ياعيني من لقى احبابه نسى اصحابه

قعدت هدى ومريم بروحهم الا تقول مريم .. هااااااااا ويش خبريني عن موضوع هالخطاطيب

هدى : لاااااا خلا ص انسى من زمان رفضت وابويي الصراحه ماغصبني على شي

مريم : على كيفش اني اللي عليي سويته و انتين ادرى بمصلحش

بعد ماتنهى اول يوم دراسي راحت هدى بيتهم ورتاحت مثل عادتها واتصلت الي (محمد)

وقاموا يتكلمون ,,,

محمد : اسمعي هدى انا ابغي منش طلب ؟؟

هدى : آمر حبيبي لك عيوني

محمد : اقول (( لاتفهميني غلط )) الصراحه انا ابغي اطلع وياش

هدى : ساكتــــــــــــــه

محمد : ويش فيش عمري

هدى : افكر ... ماتوقعتك تقول ليي جدي

محمد : يعني يصير اشوفش بس طلعش من المدرسه دقيقتين وخلاص خاطري اقعد وياش ونتفاهم

مايصير بس جدي

هدى: ويش فيك محمد اظاهر عليك ماعرفتني عدل اني ترى مو من هالنوع
ولاني متفلته واذا اني تحجيت وياك هذا بس لاني احبك وثقت فيك

محمد : طبعا مضايق عدل عدل وسكت اشوى الا يقول على راحتش خلاص خلاص لاتضايقين روحش انا مابغي اغصبش

هدى : اوكي مع السلامه

محمد : الله يسلمش حبيبتي

وبعدين هدى فكرت وقالت في قلبها ليكون حجي مريم عدل و معقوله عاد بس يتسلى بي ؟ اني خيفانه ؟

هدى لالالالا مستحيل يحبني اني متأكده هو قال ليي يحبني ومن البدايه صارحني

بكل شي عنه ,,

مو معقوله .. ومر اليوم وهدى تحاول تقنع روحها ان فكرة مريم عنه كلش غلط

ومرت ايام في ايام ومحمد ماسئلها كلششش عن الطلعه !! بالموليه

لكن بعد جم اسبوع رد فاتحها !!

هدى : محمد انت ليش جدي ليش مو راضي تفهمني اني قلت رايي في هالموضوع وانتهينا

محمد : عن خاطري افهميني اشوي انتي ليش خايفه انا حبيبتي اخاف عليش اكثر من روحي ومستحيل أأ ديش

هدى: بس انت تعرف اني مستحيل اخون ثقة اهلى ولو ويش ماطلعت وياك

محمد : انا ابغي اعرف شي واحد بس انتي خايفه احد يشوفش ؟

هدى : محمد ارجوك ممكن تسد الموضوع لان مافي امل وشيل هالفكره من بالك نهائيا

محمد : زعلان متنرفز حددددددددده المهم انا بخليش الحين مواعد لصبيان الحين بيجوني

اشوفش مره فانيه وتحملي بروحش

هدى مضااااااااااايقه وتحس على قلبها شي ثقيل قالت على راحتك مع السلامه

وبعد ماانتهت هالمكالمه هدى عرفت ان كلام مريم صح وانه مجرد مال تسليه وبس

الان الا يحب الوحده ما يطلب منها جدي ,, وقعدت تصيح جيفه انخدعت جدي فيه

جيفه !!! اني ادوس على قلبي احسن ليي ولا يقعد يلعب عليي هدا وادا يحبني صدق

على ماعتقد ايدلي البيت وبشوف والايام بتثبت ليي

صممت هدى على رايها يوم فاني راحت المدرسه وطلعتها ماشافته واستمر هالحال

اخر الاسبوع لاحظت مريم ان محمد مايجي وهدى حزينه !!

مريم : ويش فيه الافندي الا الحين مايجي ؟

هدى : متبلعمه تبلعم تقول على زامه مسكين

مريم : اهااا اني اشوف مايجي قلت يمكن متخاصمين هههههههههه

هدى : من وره قلبها ههههههههههههههههههههه

جت العصر وهي تفكر وتقول حتى مريم لاحظت ويللللللللي اني مضايقه مول

مو قادره احس روحي مخنوقه ,, صار ليي اسبوع ماسمعت حسه ولا فكر حتى يجي

او يتصل مع ان يدري العصر بروحي اكون في البيت!!

جاء اليها ابوها الا يقول هدوووي بجون ويايي بيت جدش اكي جدش تسئل عنش ؟

هدى : ابتسامه مخلوطه بالحزن اوكي لحظه ببرز روحي وهي تقول اني محتاجه اطلع اغير جو

حالتي كسيفه ..

المهم طلعوا بالسياره وصلوا بيت جدها الا بصدفه محمد واقف مع صبيان

شافته بس هو ما عطاها وجه!!!

وهي غصت تقول في خاطريها ماعطاني وجه او ماشافني او لان ابويي ويايي

افكاااااااار تجي وتروح لكن اني حسيت انه شافني متأكده صارت عيوني في عيونه

يالله دشوا دخلت هدى وسلمت على جدتها وعماتها وعلاوي بعد راح يركض وره الحمام

وهم يسولفون وهدى في عالم ثاني ومضااايقه ..وتقول صدق ظني

وعقب ما قدعوا قال ابوها يالله نقوم لان بيمر عليي حجي عبد الله ابغي اروح وياها الدختر
واحد ويانا في الشغل مرقد

راحوا البيت وسيده هدى حجرتها وقفلت الباااااااب وعلى السرير والصياح قايم

الحلقة الفامنة (8)

ودارت الايام والليالي وهدى على هالحال حتى المعلمات كلموها عن مستواها الدراسي وهم مستغربين منها لانها تغيرت

وصارت تسرح واجد وحتى بيتهم ملا حظين لاتاكل عدل وضعفانه وكله في حجرتها خامره

اما عن مريم لما حست ان صديقتها مو طبيعيه ومضايقه واجد قررت تكلمها في الفرصه

مريم : هدى ويش فيش هالايام احسش غير عندش مشكله وتبغيني اساعش فيها ؟

هدى : لا لا ديرين بال مافيي شي

مريم : ماصدق اني اشوفش غير مو مفل الاول وين هدى الورده لمفتحه وين ضحكش ماصدق ماصدق تغيرتين قولي ويش فيش؟؟؟؟

هدى : يؤؤ صدقيني مافي شي

مريم : قلبي حاس ان السالفه جايده وماتبغين تعلميني

هدى : قلت ليش لاديرين بال وخلاص ولو فيي شي تعرفيني اول وحده انتين بقول ليش

مريم : ((اتمنى )) لكن مو تقولي اني ادخل في حياتش لو ماحبشس وتهميني جان صدقيني مافتكرت

هدى : الصراحه مريم اني ومره وحده انفجرت في لصياااح

مريم : هااااا ويش فيش ويش صاير طيحتين قلبي اكيد الموضوع فيه ان , محمدوا صح ؟؟؟؟؟؟؟؟؟؟

سمعت هدى اسمه وزادت في لصياح

مريم : مسحت دموعها وحضنتها وقالت ليها طلعي الا في قلبش عشان ترتاحين

هدى : قالت الي مريم كل اللي صار وبالتفصيل ..............

مريم : شوفي هادي مو نهاية العالم وعلى فكره انتين مو اول وحده ولا اخر وحده يقص عليش واحد هلفوت نفسه

لكن احمدي ربش وشكريه ان السالفه عدت على جدي وخوش حسين مادره والله ستر عليش

هدى : صدقين اشوى ماطلعت وياه لو طلعت جان اقتل روحي من القهر

مريم : ها في ناس يطلعون ويالبنيه ويقصون عليها ويفلتونها احمدي ربش على كل حال

هدى عقب الا صار مستحيييييييييييل اوثق في اي رجال !!!!!


مريم : الحين ماليش الا تهتمين بدراسش ولا تفكرين في اللي راح وابغي هدى الشاطره ترجع مفل الاول واحسن بعد

هدى : الله كريم


مريم: وعد ؟؟؟؟؟؟

هدى : وعد وهي تبتسم ابتسامه مخلوطه بالحزن

وقربت نهايه السنه وهدى قدرت تتعود على وضعها الجديد وتنسى اللي صار

والحمد لله عدت الازمه على خير بفضل تشجيع صديقتها مريم

وطلعت النتايج ونحجت هدى بتفوق ومريم بعد واستانسوا عدل

ومن فرحه بيتهم سوو لها حفله صغيره وقررت انها تروح الجامعه

اما حسين اخوها حصل على الوظيفه الا كان خاطره فيها

وهدى في عطلة الصيف اتصلت ليها مريم خبرتها انها بسافر وياه الاهل

سوريا وبتقعد شهر ابغي اشوفش قبل لا اسافر زين

هدى اخذت شور امها وراحت الي مريم وقلدتها الدعاء والزياره

وبعد فلافة ايام هدى حست بملل وفراااغ الا تقول امااااااه

اني افكر اروح بيت جدي اقعد وياه عماتي جم يوم ويش رايش

قالت ليها امها اني مادري الصراحه قولي الي ابوش يمكن مايرضه

وافق ابوها وداها حسين


وهم رايحين بعدهم في الشارع واشوي الا متصله الي هدى صديقتها (ايمان )

امها آلووووووووو

ايمان : سلام عليكم

امها : عليكم السلام

ايمان : لو سمحتين هدى موجوده؟

امها : لا يبتي مي اهني توها بس من اشوي طالعه

ايمان : وين راحت ؟؟

امها : بيت جدها اتقول بتقعد جم يوم

ايمان : اني صديقتها ايمان قولي اليها اني عازمتنها ليلة الجمعه على الخطوبه اخويي

في صالة طيران الخليج

امها : الله يبارك ليكم ان شاء الله بقول ليها

وعلى طول امها اتصلت الي حسين واقالت ليه عطني هدى

حسين : ويش صاير

امه : هههههه مافي شي بس عطني غناتي هدى

هدي : هلا اماااه ويش

امها : اسمعي متصله ليش ايمان صديقش عازمتنش على خطوبة اخوها باجر

خل نروح شرايش

هدى : حلفيييييييي عجل بنروح لكن من مابغير رايي عن بيت جدي ههههههههه

امها : ههههههههههه انزين

هدى قالت لحسين ابغيك توديني باجر طيران الخليج

حسين : ايه ايه اتفقوا وطيحوها على راسي

هدى : عمري هالولد

حسين : صبغي صبغي

هدى : افااا اني اصبغ الاخو العسل هادا

ضحكوا اثنيهم مع بعض وصلت بيت جدها

الي اللـــــــــــــــــقاء في القادمه
سنابسية والنعم
04-15-2006, 08:36 PM
خخخخخخخخخخخخخخخخخخخخخخخ شكله احليوة السالفه
المهم اني اخويي لا يمكن اقول ليه عمري هالولد
تحياتي ننتظر اني وملك اسبانيا تكملة القصه بفارغ الصبر
ملك اسبانيا
04-15-2006, 08:50 PM
صح لسانج اختي نور الهدى (هلولو)
ننتظر القصة لانها صراحة عجيبببة
جنة الزهراء
04-15-2006, 09:28 PM
القصة اباحطها بكرا
لان احين اني مشغولة بتواقيع الافندم هلولو

فسامحوني
بس علشان اشوقكم
جنة الزهراء
04-16-2006, 05:43 AM
الحلقة التاسعة

عقب ماراحت هدى بيت جدها وقعدت الي الليل واستانست جاء اخوها وخدها

على اساس انها بتروح الخطوبه ,,

ويوم فاني وهم يتغدون قال ليها حسين هدى عاد ابغيش تكوين ليي فوب وغطره

لان بروح ملجة واحد صديقي العصر

هدى : ان شااااااء الله انت امر امر حبيبي

حسين : ههههههههههه لاتخافين بوديش الليل

المهم تعشوا وبرزوا روحهم وجاء حسين وصلهم الصاله وقال ليهم انا بجيكم الساعه احدعش

يعني طلعوا مو اجي وتوهقوني

هدى : ههههههههههه مدام جبتنا يعني ابشر هههههههههههههههه

حسين : حبايبش

هدي : ربعي كلهم اهني اسمع عاد خلها ونص

حسين :امرنا الي الله المهم بمشي انا

دشوا الصاله وفيه معازيم واجد قعدوا على الطاوله وهم يبحلقون في الصاله الا تقول هدى اللــــــــــــــــــــه كشخه

والاحلى بعد ان ديجي وشكلهم مسوين بوفيه

امها : مو عاد تنسين روحش ادا جاء اخوش تالي يستحمق علينا

سمعت هدي اسمها والتفتت الا البنات الا وياها في صف موجودين كلهم

ضحكت هدى واشرت عليهم وقالت الي امها بروح اسلم على ربعي وبرجع

امها بعد ماشافت هدى مستانسه قالت ليها روحي قعدي وياهم اني بعد برو ح الي ام جعفر اكي قاعده بروحها على الطاوله

سلمت هدى وقعدت وياهم وكل وحده تعاتب الفانيه

ليلى : هاد ويش ولا وحده فيها خير قالت بتمر ولاشي مول من عطلنا وكل وحده ماتدري بالفانيه

هدى : اي والله يعني اني الا احد جاني من سافرت مريم من الملل قلت بروح بيت جدي

ليلى : لو بعد مو خطوبة اخو ايمان ماشفنا بعض

خديجه : ياعلي اخوها حليووووووووووو

ليلى : شدراش

خديجه : رفيق اخويي كله وياه

مهلو ا اشوي الا ايمان جايه كاشخه والتسريحه حلوه والفستان احلى وجت تسلم على البنات

ايمان : اني قاعده واحاتي اقول جان مو مايجون

هدى : شدعوه بلعكس جان نغير اشوي من الروتين الصراحه من غير مجامله صاير كشوخي جنش عروس

ايمان : تضحك هههههههه لاتبالغين

هدى : هااااااا ويش بنات اشهدوا

قالوا البنات والله قمر جان ماتكنسلين على العروس

عقب ساعه تقريبا من الوناسه والضحك سمعوا صوت وحده تقول يالله بسرعه اكوا المعاريس وصلوا

الا تبغي تتغطه بسرعه ترى بيدخل المعرس

دشوا المعاريس (( هب السعــــــــــــــــــــــد ))

دارت هدى راسها تلتفت وياريتها مادارته بطلت عيونها حدها تفاجأت انصدمت انهارت

العروس حنان والطامه الكبرى المعرس هو محمد الاغاني تشتغل والجباب قايم وهدى في غيبوبه مع نفسها

مو مصدقه الا صار صدمه ماكانت على الخاطر وعلى البال ومروا العروسين من بين هدى حست انها بيوقف نفسها

الا يقولون البنات ويش رايكم فيهم قالت ليلى الصراحه يناسبون بعض عدل

هدى في خااااااااطرها اي والله صدق هالكعكه من هالعجينه

ليلى : هدى ويش فيش ؟ هدى هدى هدى

هدى ولا تدري بدنيا غايصه في افكارها ومنهاره

خديجه : هزت ايد هدى وقالت ليها وين رحتين ؟؟

هدى : ها ,, ها ,, ويش مافيي شي

ليلى وخديجه قاموا يطالعون بعض مستغربين من حال هدى

البنات راحوا يسلمون على العروس وهدى ويااهم وهي ترتجف لما وصلو الي العروس

محمد يوزع ابتسامات وتفأجا بهدى في وجهه وصااارت عيونهم في بعض

ويطالعها بنظرة سخريه ونافخ خشمه ولا كانه يعرفها

سلمت على العروس ورحت وياه البنات وهم يتكلمون عن فستانها كشخه والتسريحه

ليلى : ام بختها الصراحه اخدت واحد قمر لا وشغلته زينه وهم بخير

خديجه : في وين يشتغل ؟؟؟

ليلى : في البا لو تشوفين سيارته كشخه

خديجه : صح مره شفتها مو لونها رصاصي ؟

ليلى : ايه كل يوم يوصل الصبح ايمان ابها

هدى : في قلبها ماتوقعت ان ايمان تصير اخته

ليلى : تقول الي البنات يقولون مهرها غالي اخويي يقول واجد اشيرطوا عليه

خديجه : اشدراش ؟

ليلى : اخوي رفيقه لا اليوم رايج العصر وقال لينا

جت ام هدى قالت يابتي استوى الوقت الحين اخوش اكيد بره قومي قامت هدى وسلمت على البنات

ومشت وركبت السياره
بعد ماركبوا السياره ,, حسين قال تأخرتون انا مواعد صبيان بروح ليهم
امه : يترد تطلع يعني نص الليل ياولدي

حسين : الليله اووف يمي ماعندي الا هاليوم اسهر فيه

امه: على كيفك بس

حسين : تأخرتون واجد متأكد من هدايو ا هي قايله بتصيف

علاوي : اصلا هدى قاعده تصييح

امه : ويش تقووووووووووول؟؟؟؟؟؟!!!

تفاجأ حسين ومره وحده وقف السياره

حسين : ويش فيش هدى

هدى : مافيني شي بس دخل عيوني تراب هادا علاوي هرار

حسين : اشوفش ساكته ولا علقتي على الحفله ولا شي على فكره المعرس صديقي محمد

امه : اشدراك

حسين : الحين شفت صديقي جاسم اقول ليه الا هني قال جايب خواتي

اقول ليه خطوبة منهو عاد قال محمد وانا اليوم رايح ملجته صدق ماحطيت في بالي

امه : والله زين يعني طلعتون ربع اختك صديقة اخته

حسين : ايه

امه : الحفله كشخه من هادا ليك غناتي

حسين : يبتسم ويقول ان شاء الله

ولما وصلوا البيت نزلوا من السياره وحسين حده مستعجل عشان يروح الي ربعه

بس هدى مانزلت

حسين : هدى يالله قومي نمتين ؟.

امها : هدى هدي قومي اخوش مستعجل

حسين خله ايده على كتف هدى وهو يهزها هدي يالله قومي لا هدي ماتجاوب !!!

حسين : هدي يالله لاتصيرين عاد جاهله قومي اخرتيني

امه : بعدال ياحسين عليها لاتصادف ابها تحت المقابر
حسين عرف ان اخته مو طبيعيه وان مغمى عليها حسين امااااااه هدى مو في وعيها

هدى مغشي عليها امها تصارخ بتي ويش فيش هدى حبيبتي ردي عليي

حسين : عندش بطاقتها السكانيه ابغي نوديها الطؤاري امها حارس بغدي اجيبها

حسين بسرعه مو تتأخرين

علاوي من خوفه قعد يصيح وحسين يقول ليه اسكت لا تعور راسنا

جت الام وقعدت وياه هدى وره وهي تشممها عشان توتعي وتقول

هدوي هدوي ويش فيش ياخلف جبدي يحلال المشاكل احضر وانظر وضيفني

حسين : امااااااااه مو تقعدين تنوحين وتخوفينها ما فيها شي بس مغمى عليها

حسين يسووووووق بسرعه وهي حالنها حاله على طووووول دخلةها حجرة المعالجه وركبوا عليها سيلان

وامها تصييح وتدعي ليها

بعد اشوي اوتعت هدى

امها : ها يابتي حمد الله على السلامه

حسين: ويش فيش خيو سلامات

هدى : بصوت كلش كلش ضعيف الله يسلمكم

علاوي : انا قلت ليكم تصييح ماصدقتوني

حسين قعد يفكر في كلام اخوه علاوي وقال في باله اكيد اختي فيها شي

ولازم اعرفه لان مو معقوله بتصير حالتها جدي منى والطريق ؟!!!

جت الصبح وهم للحين في السلمانيه اتصل ابوه يقول الي حسين

ويش اخبار هدى الحين ؟ قال حسين الحين صارت احسن

ابوه: مارجعتون ؟

حسين : الحين بروح الصيدليه بأخد دوا وبنرجع

ابوه : اناللحين في الزام من ارجع البيت ابغي اشوفكم

حسين : لاتخاف ابويي الدكتور ه طمنتنا

قرب احسين السياره وركبت هدى وامها مجودتنها وخايفه عليها

حسين : من ويش صادش جدي خيوووووو

هدى : مادري مره وحده ماشفت روحي الا في السلمانيه

حسين : الدكتوره جضرتنا تقول يمكن احد مزعلنها او صايدتنها صدمه

هدى : خبرك الدكاتره كله يألفون

امها : الحمد الي الله يوم شفت عيونش ماهقيت تجي علينا الصبح

حسين : هههههههههههه خش سهره

وصلوا بيتهم ودخلت هدى حجرتها وجاء ليها ابوها واطمن عليها

امها تقول خلنا نطلع عنها عشان تنام وترتاح ماوره عليها

ابوها : من ويش عاد صار فيها جدي؟

امها : شدراني اني خفت قلت ان جان ماتسممت من الاكل

ابوها : هههههههههههههه اكلتون واجد ؟

هدى قاعده بروحها تفكر وتقول الحين هو هدني الا عشان ياخد هادي؟؟

الا حتى اخويي مايرضى امشي وياها ا ولو كان يعرف ان هادي حفلتها ماخلاني اروح

وينش يامريم تعالي لييي محتاجتنش

لو زين عندي خت اشكي ليها همومي جان ارتاح اشوي

نامت هدى وهي تفكر والدموع على خدودها بعد ماصارت هدى احسن

قرر حسين يسئلها لان مو مقتتع باللي صااااااااار

حسين : ممكن اتكلم وياش ؟

هدى حست من كلام اخوها انه مهتم فيها وحنون عليهاااااااااااااا

ويش هست حسين ؟

حسين :,,,,,,,,,,,,,,,,,,,,,,,,,

الي اللقـــــــــــــــــاء في الحلقة القادمه


باي جه الباص احين الساعة 6 الى ثلث الصبح
خادم اهل البيت
04-16-2006, 11:32 AM
*·~-.¸¸,.-~*بسم الله الرحمن الرحيم*·~-.¸¸,.-~*

*·~-.¸¸,.-~*وبه نستعين*·~-.¸¸,.-~*

اللهم صل على محمد وآل محمد الطيبين الطاهرين

السلام عليكم جميعا ورحمة الله وبركاته...

مشكورة اختي على القصة الحلوة.. وانشاء الله نشوف كل ما هو جديد..



ودمتم في رعاية المولى
جنة الزهراء
04-16-2006, 02:01 PM
الحلقة العاشرة (10)

حسين متردد مو عارف اشلون يفتح الموضوع

هدى : ويش صاير حسين ؟

حسين : هدى بقول ليش يوم كنتين في الدختر الدكتوره اتقول انش متعرضه الي انفعال و صدمه

ممكن اعرف ويش فيش؟

هدى : نزلت راسها وسكتت

حسين :جود ايد اخته وقال ليها فضفضي انا اخوش ولا تغبين عليي شي واذا خايفه مني اوعدش

ان اعطيش الامان تري انتي اختي حبيبتي اللي احبها

هدى : مافيي شي ياحسين مافيي شي

حسين يعني ماتبغين تقولين ليي؟ مافي ثقه يعني ؟

هدى : مو عارفه ويش تقول وتنهدت آآآآآآه وقالت ليه عن كل شي ..............

حسين : محمد؟؟؟؟؟ هادا ؟ الفاشل ؟ ليش ماقلتين ليي انش تعرفينه ؟ كنت بقول ليش وبعطيش فايله كامل

حتى لو بطريقه غير مباشره ادكر مره شفته وياش ليش ماخبرتيني في داك اليوم ؟

هدى : اني ماكنت اعرفه حزتها

حسين : يأختي انتبهي مو لازم توثقين في احد تري الحين لصبيان مايحبون الا مصلحتهم انا صبي واعرف

هدى : كلامك بالضبط نفس مريم رفيقتي!!

وطبعا هي قالت ليه عن كل الي صار مع محمد ومع مريم حسين عجب واجد بشخصية مريم واجد وقال ليها خش صديقه

اما بالنسبه الي محمد مستانس وكاشخ ورايح الي خطيبته والعطر مفوح دخل وسلم على خطيبته وقعد وياها في الحجره

الا يقول ليها سمعي حنان بقول ليش مو تزعلين عاد ...

حنـــــــان : آمر

محمــــد : ابغيش ماتخلين ليش حمره ولا مكياج والبالطوا نسي امره ابغي دفه وبوشيه لاني غيور

وماحب احد يشوفش غير ي

حنـــــــــان : منصدمه مو مصدقه تقول في خاطرها بل هادا ويه من اول يوم يتزمر ويتأمر

محمــــد: هااا ويش فيش الا ساكته ماجاوبتيني ؟

حنـــــــــان : مادري بس افكر لان انت يوم تاخدني كنت تعرف اني البس بالطوا واني محمد ابغي اتعلم السياقه

وخاطري اشتغل اني محمد مابغي جدي حاول تفهمني

محمـــــد : لالالالالالا اسف ماعندي نسوان يشتغلون فاني شي انا مابقصر عليش في شي

حنــــــــــان : ياعلي ملللللللللللللللللللل

محمــــــــــد : الحين قومي برزي روحش بوديش البيت وابغيش تتغطين عن اخواني فاهمه ؟

حنان : فاهمه وهي مضااااااااااااايقه عدل تقول وش هالبلوي

ركب محمد السياره وحنان وياه وكل اشوي يقول ليها جده ؟ شوفي روحش بلا بوشيه صايره غير

لالالاضروري بوشيه وحنان باقي اشوي وتصييييييييح

وصلو لكن بعد ويش بعد ماطلعت روحها من تصرفات محمد ..

سلمت على عمتها وحمواتها وقعدت وياهم اشوي ونادى عليها وراحت اليه حجرته وطبعا محمد واحد فوشاري

يراويها حجرته والاجهزه الا فيها... والا دق تلفون حنان شافت الرقم وطنشته

محمد : ردي ؟.

حنــــان : خلها تولي هادي وحده رغايه الحين اذا شلته بتعور راسي

محمـــد : على كيفش

حنان : قلبها يرجف فتحت الشنطه وقامت يا زعم تحوس فيها وهي تبند تلفونها بدون مايلاحظ محمد

وقضت اليوم وياه وراح وياها العصر واخد ليها دفه وبوشيه ,,

حنان بعد مارجعت بيتهم اتصلت الي صادق تقول ليه اسمع اني ماقلت ليك لاتتصل ليي لا ؟

لاتسوي لي مشاكل ارجوك اني الحين مزوجه ؟

صادق : لاتقعدين تسوي ليش حركات ؟ ابغي اشوفش ضروري

حنان : يويلللللللللللللي اني الحين مو نفس الاول صادق خطيبي كل الحين يتصل

صادق : سمعي ابغي اشوفش ترى ادا ماجيتين براوى رجلش صورش

حنان : افاا عليك تهددني ؟ واني الا احبك ومووت فيك

صادق ماعليي لا تقعدين تصبغين تري انا ميت حدي عليش ابغي اشوفش

حنان : انزين بحاول بس عطني وقت واسمع يقول ليك مو تصل كلش اني ادا حصلت فرصه بسوي ليك رنه



اتفقوا على هادا الشي وسكرت حنان التلفون ويوم فاني جاء ليها محمد وراحت وياه بينهم وهي لبسه البوشيه

حنان مستانسه لان خلاص مابيتصل صادق على تلفونها الا ادا هي اتصلت

نادت عليها عمتها جايين ناس بياركون يبغون يشوفونها راحت حنان وقعدت وياهم

محمد قاعد ينتظرها ويطالع التلفزيون وشوي الا يرن تلفون حنان شاله

محمد: آلوووووووو ,, آالووووووو

سكر الخط في وجهه محمد لقط الرقم وسيفه عنده مسح الرقم من تلفون حنان

شوي وجت حنان ومحمد وجه متغير بس ماقال ليها اي شي

حنان مرتبكه وخايفه تقول ويش فيه شكله مو طبيعي وعلى طول فكرت في التلفون

محمد : اسمعي بروح دقيقه البراد بأخد لينا شي ناكله ’’ حنان اوكي

طلع محمد وعلى طوول راحت تجيك تلفونها ماشافت احد متصل واطمنت وقعدت تنتظر محمد

محمد طلع واتصل من البراد على نفس الرقم الا سيفه من تلفون خطيبته

ترن ترن

........ : الووووووووووو

الى اللقاء في الحلقة القادمة


راحت على حنان<< زين اليها
جنة الزهراء
04-16-2006, 02:03 PM
اكو اباكملها

الحلقة الاحدعش(11)

محمد : آلووووووووووووو

مجهول : نعم من معاي ؟

محمد على طول صك التلفون بالزور حتى الهندي لاحظ وخاف على تلفون البراده وقام يكَركَر شنو في هادى نفر مجنون

محمد شخط سيارته وعلى طول راح حجرته الا حنان مقفلتنها طق الباب بقووووه وفتحته وهي خيفانه مرتبكه تقول ليه ويش فيك

محمد : ليش قافله الحجره ها ؟

حنان : عادي لاني فاسخه الحجاب حبيت اخذ راحتي ؟

محمد : وين تلفونش وينهو ؟

حنان : كلش صار وجهاا كركم وهي مو عارفه تتصرف

محمد : ويش فيش اقول ليش جيبي التلفووووووون

حنان : انزين بس ويش فيك تصارخ ها ؟

والخوف واضح عليها وجسمها كله يرتعش وريقها ناشف

طاولته التلفون وقام واتصل على نفس الرقم الا سيفه وقال ليها الحين اتكلمي وتحتي

بعدين الا يقول لحظه تلفونش مافيه ( مايك ) لحظه بغير البطاقه ويه تلفوني حنان باقي اشوي ويغمى عليها

واتصل وقال ليها يالله الحين اتكلمي بسمعش ..

حنان .. ابغي اعرف ويش صاير؟

حنان في ايدها التلفون وتتصل وقلبها يرجففففففففففففف ان شاء الله يربي مايشيله

المجهول : آالووو حناني هلا عمري شخبار ؟

حنــــــان طاح التلفون من ايدها وهي تطالع محمد بشفقه تترجاه يسمعها ويستر عليها

محمد : ممكن اعرف منهوووووو هذاااااااااااا؟؟؟؟؟؟؟؟؟؟؟ علميني وهو جاز شعرها ويضرب

محمد يصييييييييح ويقول ويش سويت فيش عشان تجازيني جدي لكن بطلقش اكيد طلعتين وياه

بفضحش

حنان : لالالالالالالالالالالالا حرام عليك صدقني اني احبك واخاف ومحافظه عليك لا تظلمني

محمد : اعصابه منفلته وعيونه الشرار يطلع منها يالله ابسرعه البسي حجابش وبوديش بيت ابوش مابغييييييييييش ولا للي حاجه فيش

حنان تتوسله ومجوده ارجوله وهو يقول ليها هديني لاجوديني قلت ليش مابغيييييييييشششششششش

قال ليها انا بروح السياره وابغي اشوفش جايه يالله وبسرعه سمعت امه الاصراخ وراحت دخلت الحجره


امه : ويش فيك ياولدي على لبنيه تفاجأت ان حنان حالتها حاله من لصياح والضرب

محمد : مافيني شي بس هادي مابغيها انا !!

امه : صلوا على النبي بقوم اشببكم عيون وصادتكم

محمد : اماااااااااه بلا هالحجي هادى الا مايودي ويجيب انا يمه ماخذ اخماااااااام

وامه ويش صاير علموني لا تفضحونا ويش بيقولون الناس امس اول امس خطوبتهم واليوم بيطلق؟.

محمد : خل الا بيقول يقول بس هادي ( الحمام ) مابغيها قومي وياي بوديها الي امها

محمد راح السياره حنان مجوده عمتها عمتي ستري عليي اني بقول ليش كل شي بس لا تخلين محمد يفضحني

عمتها : قولي ويش صاير حنان وهي تصيح ومنهار قالت كل شي الي عمتها ,,,,,,,,,,

قالت ليها قومي الحين روحي بيتكم يابتي وكسري الشر واني بتفاهم وياها ولا يصير خاطرش الا طيب

ركبت حنان قدام ومحمد ويشششششششش قومي قومي مابغيش تقعدين وياااي خلاص احمدي ربش مافلتش في الصندوق


امه ركبت وهي تندعي وتقول الله يهديكم

وصلوا بيت حنان ومحمد قومي حووولي حولت عيونش ان شاء الله

صكت حنان الباب مال السياره وهي خايفه من الفضيحه الا تنتظرها وان بيتهم بيضربونها

محمد من وصل امه بيتهم اتصل الي ( المجهول ) وقال ليه ابغي اشوفك ضروري عند مركز ستره الصحي

المجهول بعد دقايق بجيك .. اتصل الي حنان الا تلفونها مبند وقرر يروح الي محمد

التقوا مع بعض وقال ليه ابغي اعرف ويش علاقتك باحنان ؟؟ اعترف ومن غير لف ودوران

المجهول ( صادق ) انا ماعرفها ولاشي .

محمد اعترف احسن ليك هي قالت ليي كل شي ترى

صادق : انا صح كنت اعرفها بس مابيني وبينها شي غلط

محمد في خاطره ماقلت جدي الا اكيد لمستها يالنحيس

محمد : اسمع بقول ليك طلعت وياهاااااااااااا

صادق : الصراحه ايه لكن بس مره او مرتين بس

عرف محمد كل شي عن حنان وقال زين زين عجل تنتظر ورقة طلاقها اذا خاطرك فيها بخليها ليك

مشي محمد وهو مضايق عدل ويفكر شوي الا تلفون محمد يضرب ترن ترن ترن

محمد : ويشششششششش تبغين ؟؟؟؟؟؟؟

الي اللقـــــــاء في الحلقة القادمه
جنة الزهراء
04-16-2006, 02:08 PM
الجزء الاخير

الحلقة الافناعش(12)


محمد معصب ولاهو عارف من اللي قاعد يكلمه عرف محمد ان مو حنان المتصله !!

وان امها الا متصله

ام حنان : ويش صاير علمني ها ويش سويت في بتي كلمني يالحقيرر

محمد : ويش صاير ها محمد خاف من لهجة عمته لان كانت قاسيه وتصيح

ام حنان : قتلت بتي ياللي ماتخاف الله ويلللللللللي على شبابها

محمد : خايف عدل والف فكره في باله وقال عمه ويش صاير علميني

ام حنان : حنان اتنحرررررررررررت وامها تصيييييح عدل

محمد : الحين وين حنان عمه كلمني صكت التلفون في وجهه على طول اتصل على تلفون خطيبته عشان يعرف السالفه

ترن ترن ترن مايرد افففففففففف ويش صاير ياربي خوفتني هادي

راح بيتهم وهو خايف عدل دخل على خواته وهو يصارخ وين امي ؟؟

خواته من الخوف مو عارفين يكلمونه !!!

محمد : قوموا شوفوها بسرعه يالله لاتقعدون اتطالعوني

اخته ايمان : محمد امي اتصلوا ليها بيت حنان وراحت لان يقولون حنان في الدختر شاربه حبوب وانتحرت وامي خافت عدل وراحت ليهم

محمد اسمعي انا بوديش بيتهم وبحارسش وتعالي قولي ليي ويش صار بالضبط

ايمان لبست حجابها ودفتها وراحوا......

وصلوا بيت حنان الا عالم وناس واجد محمد ارتبك وخاف عدل ومو عارف حتى يتكلم

شافوه لصبيان وراحوا ليه وقالو ا عظم الله اجركم !!

محمد : على طوووووووول اغمى عليه !!!!!!!!

هدى : كانت قاعده في البيت ودخل عليها حسين اخوها وقال ليها بكل الا سمعه

هدى متعجبه ويش صاير وحسين قال ليها بس ان يقولون حنان توفت منتحره

هدى اني بروح اشوف ويش صاير بنفسي

حسين : اسمعي هناك ناس واجد ولا تروحين تالي تخافين لان صاير بيتهم يخوف

هدى : خلني بروح بشوف ماني مصدقه ان حنان توفت وياايي في المدرسه

هدى : راحت بيت حنان ومثل ماقال حسين عالم والصراخ واصل الي بره

دخلت هدى وشافت ام حنان ا تصيح وهي تقول قتلها قتلها لبها ولا باهالخطبه الميشومه

هدى ماقدرت تقعد اكثر طلعت وشافت صديقتها مريم !!

مريم : هلا هدى سمعتين عن الا صار ؟

هدى : ياعلي مو مصدقه

مريم : اشوي ماعرس عليش انتين جان الحين انتين الضحيه

هدى : لاتقولين جدي حنان بعد مسكينه ماليها ذنب

مريم : اي والله معورني قلبي عليها

حسين ينتظر هدى لان خايف عليها شوي الا هدى ومريم جايين حسين شاف مريم

ونزل راسه وابتسم مريم سلمت عليه

حسين : ويش عرفتون الا صار ؟

هدى : ايه يقولون من محمد مهاوشنها وسوت في روحها جدي

مريم : مسكينه كاسره خاطري حنان بعدهي شباب

حسين : بعد كل هذا من اهمال بيتهم الحين توهم موتعيين

مريم : لاتصير قاسي ياحسين كل واحد ذنبه على جمبه

حسين : صدقتين

وهدى : ساكته وتعيد الا صار كله وتقول معقوله كل هذا يطلع منك يامحمد خدعتني وقلت ماعله لكن ليش سويت في لبنيه جدي ليش ليش!!!

مريم : هدووي ورين سرحتين !!!؟

شوي الا جاي جعفر الي حسين ,,

حسين في خاطره يقول افففففففف ماجاء الا الحين هادى اهني مريم

راح حسين الي جعفر وشافه

جعفر : بجي وياي المقبره

حسين : جابوها ؟؟

جعفر : اسمع يقولون

حسين : اوكي يالله خل نروح

جعفر : يقولون محمد السبب ومن سمع عنها منتحره اغمى عليه واسمع يقولون

للحين مايوتعي

حسين : والله بلوى من الخوف هادا احسه يمثل

جعفر : لالالا مو زين صدق

حسين : خاطري اعرف ويش صاير بالضبط كل واحد يقول كلام غير

جعفر : الله يرحمها تعرفها يعني يقولون محمد كشفها ان وياها واحد

وقال بيطلقها ومن خوفتها من الفضيحه انتحرت

حسين : ليش يعني ويش فيها الا كانت على علاقات مو انسانه

هو بعد على علاقات لو حلال عليه وحرام على غيره

جعفر الله مايضرب بعصى هذا انتقام من الله على الا يسويه في بنات الناس

حسين يذكر اخته وحرقت قلبها وقال صدقت يابو صادق

وصلوا المقبره وشاركوا في الجنازه ورجعوا البيت اما عن محمد الصدمه صارت قويه عليه وصار معقد مايطلع من بيتهم وكله يفكر .. وكل ويوم والثاني ماودوه مستشفى الاعصاب

ومرت الايام واليالي وهدى راحت الجامعه ومستانسه فيها وتطلب الله يحقق احلامها وتصير دكتوره

وتعرفت على بنات واجد و في وحده من البنات عجبت فيها وخطبتها الي اخوها ومريم عجب فيها حسين وتقدم الي خطبتها وصاروا مريم وهدى مخطوبين ومتهنين


النهاية

بعد اباحط اليكم وحدة
ملك اسبانيا
04-16-2006, 07:12 PM
مشكووورة اختي جنة الزهراء
على هذي القصة الرووووعة
وننتظر الثانية على احر من الجمر
سنابسية والنعم
04-16-2006, 08:40 PM
مبرووووووووووووووووووووووووووووك حليوة القصه
جنة الزهراء
04-16-2006, 08:52 PM
أوكي
ابادور وبحط
الله يخليكم للمنتدى
ملاك_نجمة صبح
04-18-2006, 07:45 PM
كشووووووووووووووووخي
تسلمسن اختي